Litva NATO Nizamnaməsinin 4-cü maddəsini aktivləşdirə bilər

Litva, Belarus ərazisindən gələn hava şarlarına görə NATO-ya müraciət edərək Nizamnamənin 4-cü maddəsi üzrə məsləhətləşmələrin aparılmasını xahiş edə bilər. Bu barədə "Reuters" agentliyinə istinadən Litva Baş naziri İnqa Ruqinene məlumat verib.

Baş nazir qeyd edib ki, Litva bu təhlükəyə cavab olaraq Belarusla sərhədi tamamilə bağlayır. Bundan əlavə, ölkənin hava məkanında görünən bütün hava şarları vurulacaq. Sərhədi keçmək üçün ciddi məhdudiyyətlər tətbiq edilir; yalnız diplomatlar və Belarusu tərk edən Avropa İttifaqı vətəndaşları buraxılacaqlar.

NATO Nizamnaməsinin 4-cü maddəsi ittifaq üzvlərindən hər hansı birinin ərazisi, siyasi müstəqilliyi və ya təhlükəsizliyi təhdid altında olduqda, üzv dövlətlərin bir-biri ilə məsləhətləşmələr aparmasını tələb edir. Litva bu maddəni aktivləşdirməklə Belarusdan qaynaqlanan hava şarları məsələsini alyans-daxili müzakirələrə çıxarmağı planlaşdırır.