Norio Sayto: Bu il ADB-nin yeni öhdəlikləri ötənilki göstəricidən az ola bilər

Asiya İnkişaf Bankının (ADB) cari layihələr portfelinin ümumi dəyəri 100 milyard ABŞ dollarını keçib.

ADB-nin Su Ehtiyatları və Şəhərsalma İdarəsinin baş direktoru Norio Sayto bu məlumatı Bakıda keçirilən III Azərbaycan Milli Şəhərsalma Forumunda (NUFA3) açıqlayıb.

O, ADB-nin həm dövlət, həm də özəl sektorda əməliyyatlar apardığını xatırlatdı.

Baş direktor qeyd edib ki, bankın portfeli hazırda 100 milyard ABŞ dollarını ötür. Şəhər nəqliyyatı nəqliyyat sektoruna daxil olduğundan, bu istisna edilməklə, şəhər sektoru üzrə portfel təxminən 17 milyard ABŞ dollarıdır. Portfelin 50 %-dən çox hissəsi Cənubi Asiyanın payına düşür; Hindistan və Banqladeş burada liderdir. Mərkəzi və Qərbi Asiya isə portfelin təxminən 15 %-ni təşkil edir, və bunun böyük hissəsi Pakistan və Özbəkistana məxsusdur.

Onun sözlərinə görə, ADB hər il təqribən 3 milyard ABŞ dolları həcmində yeni öhdəliklər götürür.

N. Sayto əlavə etdi ki, keçən il bu məbləğ daha çox idi, lakin bu il bir qədər az ola bilər. Həmin 3 milyard dolların təxminən 50 %-i iqlim maliyyəsi olaraq nəzərdə tutulur. Bu maliyyənin təxminən üçdə ikisi iqlimə uyğunlaşma işlərinin ödənilməsini əhatə edir.