“Həkim çatışmazlığının aradan qaldırılması üçün işlər davam edir“ -Zamirə Ədilova

TƏBİB-in İctimaiyyətlə əlaqələr və kommunikasiya departamentinin rəhbəri Zamirə Ədilova qurumun hazırkı kadr vəziyyəti haqqında məlumat verib. O, hazırda TƏBİB-in tabeliyində 91 publik hüquqi şəxsin və 2 701 tibb müəssisəsinin olduğunu bildirib. Bu müəssisələrdə ümumilikdə 93 064 işçi çalışır. Həmin işçilərin 16 923-ü həkimdir. Ədilova qeyd edib ki, personalın 8 faizi xaricdə təhsil almış mütəxəssislərdən ibarətdir. Ölkə üzrə böyük bir tibb şəbəkəsi mövcud olsa da, bölgələrdə ixtisaslı kadr çatışmazlığı problemi qalır. Həkim potensialı ilə bağlı paytaxt və regionlar arasında ciddi fərqlər müşahidə olunur.

Xüsusilə regionlar üzrə bəzi ixtisaslarda boşluqlar qeydə alınır. Qərb regionları bu çatışmazlıqdan daha çox təsirlənib. Hazırda bu ərazilərdə cərrah, nefroloq, qastroenteroloq, travmatoloq, reanimatoloq, dermatoveneroloq və ailə həkimi kimi sahələr üzrə mütəxəssis çatışmazlığı görünür. Ölkənin qərb hissəsində bu ixtisaslara olan tələbat yüksəkdir. TƏBİB bölgələrdə həkim çatışmazlığının həlli istiqamətində daimi olaraq işlər aparır.

Kadr ehtiyacını aradan qaldırmaq üçün mühüm addımlar atılıb. Nazirlər Kabinetinin müvafiq qərarına uyğun olaraq, işə qəbul prosesi tamamilə rəqəmsallaşdırılıb. TƏBİB-in tabeliyində fəaliyyət göstərən tibb müəssisələrindəki bütün boş iş yerləri elektron portal üzərindən namizədlərə şəffaf şəkildə təqdim olunur. Namizədlər mövcud vakansiyalara bu portal vasitəsilə müraciət edə bilərlər. Bu metod namizədlərin seçimi prosesində açıqlığı təmin edir.

Dövlət tibb müəssisələrində ixtisaslı kadr çatışmazlığının aradan qaldırılması üçün əlavə layihələr də həyata keçirilib. "İcbari Tibbi Sığorta üzrə Dövlət Agentliyi" tərəfindən bu məqsədlə bir layihə gerçəkləşdirilib. Layihənin əsas hədəfləri tibb işçilərinin ixtisaslarını artırmaq, tibbi xidmətlərin keyfiyyətini yüksəltmək və əhalinin icbari tibbi sığorta çərçivəsində tibbi xidmətlərə çıxış imkanlarını genişləndirməkdir. Bu layihə çərçivəsində 68 həkim-mütəxəssis TƏBİB-in tabeliyindəki Şəmkir Rayon Mərkəzi Xəstəxanasına işə qəbul edilib. Cəlb olunan bu həkimlər daha çox tələbatı olan cərrahi, radioloji, terapevtik və pediatrik profilli ixtisaslar üzrə mütəxəssislərdir.