“Səhiyyə xidmətlərinə tələbat artır” -Zamirə Ədilova

TƏBİB tabeliyində olan tibb müəssisələrinə 2025-ci ilin yanvarından oktyabr ayına qədər edilən müraciətlərin sayı ölkədə səhiyyə xidmətlərinə olan ictimai tələbatın getdikcə artdığını göstərir. TƏBİB-in İctimaiyyətlə əlaqələr və kommunikasiya departamentinin rəhbəri Zamirə Ədilova bu məlumatı Gəncədə keçirilən təlimdə açıqlayıb. Təlim İcbari Tibbi Sığorta üzrə Dövlət Agentliyi və Tibbi Ərazi Bölmələrini İdarəetmə Birliyi tərəfindən media nümayəndələri üçün təşkil edilmişdi.

Zamirə Ədilova qeyd edib ki, sözügedən dövrdə 21 milyon 41 mindən çox müraciət qeydə alınıb. Ümumi 77 milyon 404 mindən artıq tibbi xidmət göstərilib. Eyni zamanda, 309 mindən çox cərrahi əməliyyat icra edilib, həmçinin 32 milyon 752 mindən çox laborator müayinə aparılıb. Hazırda TƏBİB xidmətlərin əlçatanlığını artırmaq və onların keyfiyyətini yüksəltmək məqsədi ilə bir sıra layihələr həyata keçirir. Bu rəqəmlər göstərir ki, səhiyyə sisteminə inam və müraciət kəskin yüksəlib.

TƏBİB ilkin səhiyyə xidmətlərinin gücləndirilməsi istiqamətində genişmiqyaslı institusional addımlar atır. Mövcud idarəetmə, maliyyələşdirmə, kadr potensialı və infrastruktur üzrə aparılan təhlillərin əsasında "İlkin tibbi-sanitariya yardımının təkmilləşdirilməsinə dair Konsepsiya Sənədi" hazırlanıb. Bu sənəd xidmətlərin əlçatanlığı, keyfiyyəti və dayanıqlığı üzrə yeddi strateji istiqamət və 36 tədbiri əhatə edir. Əsas hədəflərdən biri ilkin səhiyyə müəssisələrinin maddi-texniki bazasının yenilənməsidir. Bu layihə güclü ilkin tibbi-sanitariya yardımının yaradılması, profilaktik və sağlamlaşdırıcı tədbirlərin güclənməsi, əhalinin sağlamlıq problemlərinin vaxtında aşkarlanması və onların ən yaxın ərazidə həll edilməsi məqsədini daşıyır. Artıq layihənin pilot icrasına Bərdə rayonunda başlanılıb.

Regionlarda cərrahi və anestezioloji xidmətlərin inkişafı TƏBİB-in diqqət mərkəzindədir. "Zəruri cərrahiyyə və anesteziya xidmətlərinin təşkili üzrə Yol Xəritəsi" 2030-cu ilə qədər ölkənin fərqli bölgələrində nevroloji, ürək-damar, protezləmə kimi yüksək texnologiya tələb edən cərrahi xidmətlərin əlçatanlığını artırmağı hədəfləyir. Bu Yol Xəritəsi regionlara ixtisaslı kadrların cəlb edilməsini və davamlı tibbi təhsil proqramlarının tətbiqini də nəzərdə tutur. Layihə 2015-ci ildə təsis edilmiş “Qlobal Cərrahiyyə 2030” üzrə Lanset Komissiyasının hədəflərinə uyğun icra olunur. TƏBİB 2028-ci ilə qədər ölkə üzrə 44 əsas zəruri cərrahi prosedura, 2030-cu ilə qədər isə regional səviyyədə daha çox - 90 proseduraya çıxışın təmin edilməsini planlayır. 2030-cu ildən sonra TƏBİB mərkəzlərində neyrocərrahiyyə, ürək cərrahiyyəsi, protezləmə kimi ixtisaslaşmış cərrahi xidmətlərin təşkili mümkün olacaq.