Atəşkəs elan edildi: Biden'in açıqlaması

ABŞ Prezidenti Biden, İsrail və Livan hökumətləri arasında atəşkəs sazişinə nail olunduğunu elan etdi. Sazişin səhər saat 5-dən etibarən qüvvəyə mindiyini bildirən Biden, Livan ordusunun 60 gün ərzində ölkənin cənub sərhədində mövqe tutaraq nəzarəti ələ keçirəcəyini vurğuladı.

Saziş, Hizbullahın silahsızlandırılması və Litani çayının şimalına çəkilməsini nəzərdə tutur. Biden, 60 günlük müddət ərzində İsrail ordusunun da həmin ərazidən tədricən çıxarılmasını söylədi. Bu prosesdə heç bir Amerika əsgərinin iştirak etməyəcəyini qeyd edən Biden, uzun sürən diplomatik səylərin nəticəsində bu razılığa gəlindiyini bildirdi.

ABŞ və Fransanın başçılıq etdiyi beynəlxalq bir koalisiya atəşkəsin icrasına dəstək verəcək. Məcburi köçkün düşən Livanlıların və İsrailin şimalındakı yəhudi yaşayış məntəqələrinin sakinlərinin evlərinə qayıdışı təmin olunacaq.

Biden, Türkiyənin də atəşkəs üçün səylərə qoşulduğunu bildirdi. "Bu sazişin düzgün tətbiq edilməsindən əmin olacağıq. Hizbullah sazişi pozarsa, İsrail cavab hüququna malik olacaq. Qəzzə xalqı cəhənnəm içində yaşayırdı. Çox sayda dinc sakin əziyyət çəkdi, Hamas atəşkəsə razılıq vermədi. Hamas üçün yeganə yol girovları azad etməkdir. Türkiyə, Misir və Qətərlə birlikdə atəşkəs üçün səylərimizi davam etdirəcəyik. Filistinlilərin öz dövlətinə sahib olacağı bir gələcək üçün çalışmışam" dedi Biden.

Məlumata görə, İsrail ordusu və Hizbullahın geri çəkildiyi əraziyə 5000-10000 Livan əsgəri yerləşdiriləcək. BMT Təhlükəsizlik Şurasının 1701 saylı qərarına uyğun olaraq, Livanda silah satışını və istehsalını hökumət nəzarətə alacaq.

Digər məlumatlara görə isə, ABŞ Hizbullahın sazişi pozması halında İsrailə yenidən hücum hüququ verəcək gizli bir razılığa gəlib.