Vətən müharibəsi tarixdə həm də vətənpərvərliyin, həmrəyliyin və fədakarlığın ən ali nümunəsi kimi qalacaq - AHİK sədri

8 Noyabr - Zəfər Günü Azərbaycan tarixinə qızıl hərflərlə yazılıb. Bu gün xalqımızın yaddaşında həmişə yaşayacaq. Biz bu günü hər zaman böyük sevinc və qürurla xatırlayırıq. AHİK sədri Sahib Məmmədov 8 Noyabr- Zəfər Günü münasibətilə keçirilən tədbirdə çıxış edərkən bu fikirləri səsləndirib.

O bildirdi ki, bu şanlı tarix Azərbaycan xalqının əzmini və birliyini bütün dünyaya göstərdi. Bu, həm də dövlətimizin gücünü, yenilməz və rəşadətli Ordumuzun qəhrəmanlığını bir daha sübut etdi.

Sahib Məmmədov vurğulayıb ki, Qələbə xalqın bütövlüyü sayəsində mümkün oldu. Azərbaycan əsgəri döyüş meydanında vuruşurdu, xalq isə arxa cəbhədə bir məqsəd ətrafında birləşmişdi: Vətən uğrunda qələbə qazanmaq. O qeyd etdi ki, hər bir vətəndaş bu Qələbəyə öz töhfəsini verdi. 44 günlük Vətən müharibəsi tarixdə vətənpərvərliyin, həmrəyliyin və fədakarlığın ən ali nümunəsi kimi qalacaq. Bu hadisə Azərbaycan xalqının əbədi birliyinin simvoludur.